barokna podmornica | Таа подморница плови помеѓу потонатите градови што лежат како некакви шарени геолошки слоеви, кaко сплескани купишта седиментни карпи кои, како што се знае, настанале со таложење. Наоколу се креваат спиралните лушпи на џиновските полжави, огромните седефни школки – но, не, тоа се остатоци од некогашните палати и триумфалните порти, по малку заоблени од морските струи што минуваат низ некогашните улици. Подморницата има чудни израстоци од сите страни - некој вид пипала што можат да се вовлечат и пак да се извлечат, во случаите кога вкусните морски црви ќе се појават од песокот во кој живеат. Бам – и црвот е вовлечен во подморницата! Бам – и неговиот кожурец , што е несварлив, излетува пак назад! Врз подморницата има телескопи, микроскопи, жироскопи, хороскопи, а најодзади се влечкаат и две слушалки, некој вид стетоскоп. А перископ, каде е перископoт? Не е можно дека перископот е заборавен! Но затоа, пак, командната кула е барокно украсена со многу архитектонски детали, раскошни балкони, дури и по некоја статуа. Таму може убаво да се седи и, во топлите летни вечери, да се ужива во бескрајноста на морската шир. Но кој мисли на уживања во вакви кризни времиња!